Erion Veliaj i është përgjigjur edhe njëherë të gjithë atyre që kritikojnë sheshin Skenderbej mes tyre edhe Sali Berishës.
Kur flasin për betonizimin e Sheshit i bëjnë kritikat nga Roma, tha Veliaj, duke kujtuar se në sheshet kryesore të Europës nuk kanë pemë…
“Thanë nuk ka gjelbërim sheshi. Vetë janë jashtë, në sheshin San Marko në Venecia ku nuk ka asnjë pemë. Është i gjithi rrasë guri, ose i shkruajnë kritikat nga Roma. Shën Pjetri në Romë, me Saliun të parin që ka shkuar disa herë te Papa, e ka parë që nuk ka asnjë pemë. Sheshi i Kuq në Moskë ka vetëm një pemë e cila është kryesisht për funksionet e Vitit të Ri. Ne kemi sot një shesh që ka 28 mijë metra katror pllakë për metaforën e 28 mijë kilometra katrorë Shqipëri dhe 32 mijë metra katrorë gjelbërim”, sqaroi kryebashkiaku.
Deklarata e tij u bë nga njësia bashkiake nr. 2, ku Veliaj ishte përkrah deputetit Pandeli Majko për të prezantuar punët e bashkisë.
Edhe socialisti Majko foli për Sheshin duke hequr paralele me Parisin dhe Kullën Eifel. “Po e filloj me projektin simbol, që ka hapur debate këto kohët e fundit, përgjithësisht raporti me të bukurën hap debat, siç është raporti me debatin për sheshin. Po sjell një paralele që më është fiksuar lidhur me debatin që është hapur në Francë. Kur u bë Kulla Eiffel, çfarë nuk e mallkuan kur u bë, ç’është kjo karabina, ç’është ky hekur. Shëmtia e Parisit, do turpërojë Parisin. Në fakt ajo sot është simbol i Parisit. E njëjta gjë kam përshtypjen është ky inaugurim, një inaugurim shumë i vonuar, në një shesh që duhej të ishte bërë prej shumë kohësh”, u shpreh ai.
