Shembja e Teatrit Kombëtar tashmë e ka futur politikën shqiptare në një debat të ashpër, ku opozita akuzon mazhorancën për korrupsion, ndërsa kjo e fundit përpiqet të paraqes sa më shumë fakte për të treguar pse godina e teatrit duhet shembur.
Lidhur me këtë çështje, kryeministri Edi Rama, ka zgjedhur që të citojë aktorin Bujar Asqeriu, për të treguar pse duhet të ndërtohet një teatër i ri.
Përmes një postimi në “Facebook”, Rama ka publikuar fjalën e Asqeriut, i cili shprehet se nuk mund të futet më te teatri aktual, pasi sipas tij, është sëmundje dhe në të kanë vdekur shokët e tij.
Postimi i Ramës
Aktori i famshëm, Bujar Asqeriu, i përket një brezi të ndërmjetëm, mes mjeshtrave që themeluan Teatrin Kombetar gjatë epokës komuniste dhe të rinjve, që erdhën në skenë kur regjimit komunist i erdhi fundi.
Ai krijoi një galeri të pasur rolesh, në ekran dhe në skenë, duke fituar zemrat e respektin e publikut. Në këtë çështjen, “prishet nuk prishet” rrënoja e teatrit, Bujari ishte zëdhënës i fuqishëm i protestës fillestare; kur i tërë komuniteti u mblodh bashkë, për të garantuar vijën e kuqe të mosprekjes së territorit të Teatrit Kombëtar për ndërtime të tjera.
Qyshse kjo çështje u sqarua qartë e prerë me qeverinë e me bashkinë, që s’kanë pasur kurrë ndërmend të përdorin truallin e teatrit për tjetër gjë, përveçse për ndërtimin e Teatrit të Ri Kombëtar, Bujar Asqeriu, njësoj si shumica dërrmuese e komunitetit teatror, mbështet pa rezervë shembjen e të vjetrit e ndërtimin e të riut.
BUJAR ASQERIU:
Nuk jam për protesta, nuk i mbështes. Dua të dëgjohen arkitektët. Unë më në atë godinë nuk futem sepse është sëmundje. Nga ajo godinë ku vdiqën shokët e mi, më duket se jam sëmurur edhe unë. Dua një Teatër të ri dhe nuk ka më kuptim që të vihemi kundër njëri-tjetrit, por t’ua lëmë këtë çështje arkitektëve. Boll se u teprua!/ Opinion.al E.Xh.
