Kryeministri Edi Rama ka reaguar në lidhje me vdekjen e tre ushtarëve amerikanë në Lituani.
Përmes një postimi në rrjetet sociale, Rama shpreh ngushëllimet për humbjen e 3 ushtarëve, duke theksuar se Shqipëria është gjithnjë pranë SHBA-ve.
“Lajme tragjike nga Lituania. Humbja e ushtarëve amerikanë gjatë stërvitjeve të fundit ushtarake është një kujtesë e dhimbshme e rreziqeve që përballen ata që shërbejnë. Mendimet dhe lutjet tona janë me familjet e tyre. Si gjithmonë, Shqipëria qëndron pranë Shteteve të Bashkuara dhe Komandantit të saj të Përgjithshëm”, shkruan Rama.
Kujtojmë se 3 ushtarët amerikanë u gjetën të vdekur këtë të hënë në Lituani, pasi rezultonin të zhdukur që prej 25 Marsit. Siç raportohet në mediat e huaja, ata humbën jetën gjatë stërvitjes ushtarake në kuadër të operacionit të njohur “Zgjidhja atlantike”, që nisi pasi Rusia pushtoi Krimenë.
