Mediat kineze kanë ndryshuar raportimin mbi doktorin Li Wenliang, nga i vdekur në gjendje të rëndë.
Mediat shtetërore thanë se Li Wenliang kishte ndërruar jetë në Wuhan por më vonë ndryshuan lajmin duke raportuar se doktori është në gjendje kritike për jetën.
Li u shpall i vdekur në orën 21:30 me kohën lokale të enjten, dhe lajmi u raportua nga mediat shtetërore kineze, duke shkaktuar një valë të madhe reagimi popullor në Weibo, ekuivalent i Twitter në Kinë
Gazetarët dhe mjekët në vendngjarje, të cilët nuk duan që emrat e tyre të përdoren, i thanë BBC-së dhe mediave të tjera që zyrtarët qeveritarë më pas ndërhynë.
Mediave zyrtare iu thanë të ndryshojnë lajmet e tyre për të thënë se mjeku ishte ende duke u trajtuar.
Raportet thanë se mjekut iu dha një trajtim i njohur si ECMO (oksigjenimi i membranës jashtë-korpore) që mban zemrën e një personi duke pompuar dhe mban gjakun e tyre të oksigjenuar pa kaluar nëpër mushkëri.
Më 30 dhjetor doktori Li Wenliang u dërgoi një mesazh kolegëve të tij në Wuhan duke i paralajmëruar të vishnin rroba mbrojtëse për të shmangur infeksionin.
Katër ditë më vonë ai u thirr në Byronë e Sigurisë Publike, ku iu tha të nënshkruajë një letër. Në letër ai u akuzua për “bërjen e komenteve të rreme” që kishin “trazuar rëndë rendin shoqëror”.
Ai ishte një nga tetë personat që policia tha se po hetohej për “përhapjen e lajmeve të rreme” Autoritetet lokale më vonë i kërkuan falje Dr Li.
Deri më tani nga shpërndarja e koronavirusit kanë vdekur më shumë se 560 persona dhe janë infektuar më shumë se 28,000 të tjerë në Kinë.
Koronavirusi shkakton probleme të rënda me frymëmarrjen dhe disa nga simptomat janë kollë dhe temperaturë.
Ndërkohë, Kina ka marrë masa të tjera teksa tenton të parandalojë shpërndarjen e virusit.
Pekini ka ndaluar organizimin e drekave dhe darkave në grupe, ndërsa në Hangzhou dhe Nançang janë duke përcaktuar se sa anëtarë të familjes mund të largohen nga shtëpia brenda ditës.
Provinca Hubei, që është prekur më së keqi nga virusi, ka bllokuar funksionimin e ashensorëve, për të dekurajtuar daljen e banorëve nga banesat. /Opinion.al
