Presidenti i Republikës së Shqipërisë, Ilir Meta ka shprehur ngushëllimet për ndarjen nga jeta të humoristit shkodran, Mjeshtrit të Madh Paulin Preka.
Meta në postimin e tij në rrjetet sociale thotë se Shkodra humbi një personalitet i cili i dha popullit shqiptar disa rreze gëzimi mes izolimit në erresërië për dekada gjatë regjimit komunist.
“Ndarja nga jeta e Mjeshtrit të Madh, Paulin Preka lë pas një boshllëk të madh dhe të pazëvendësueshëm në artin shqiptar.
Shkodra humbi një personalitet, që simbolizonte humorin e saj brilant dhe shpotitës, ndërsa teatri dhe kinematografia një aktor me dimensione të mëdha, që me karakteret dhe rolet e dashura që luajti, i dha rreze gëzimi një populli të izoluar në errësirë për dekada.
I skalitur në memorien e publikut shqiptar, kujtimi i tij do të mbetet i paharruar dhe gjithmonë i respektuar!
Ngushëllime familjes dhe komunitetit të artistëve!
Të prehet në paqen e merituar!”- shkruan Meta
Ndërkohë më herët për vdekjen e aktorit ka reaguar edhe kreu i Partisë Demokratike, Lulzim Basha i cili ka shprehur ngushëllimet e tij.
Nëpërmjet një postim në “Twitter”, kryedemokrati Basha shkruan se aktori i ndjerë do të mbetet gjithmonë pjesë e plejadës së aktorëve të shquar të teatrit dhe kinematografisë shqiptare, i cili me humorin e tij ai i dha ngjyra zymtësisë së jetës së shqiptarëve në vitet e regjimit komunist.
Kujtojmë se aktori ka ndërruar jetë ditën e sotme në Itali ku jetonte prej kohësh.
Postimi i plotë
Sot arti dhe artdashësit shqiptarë janë në zi për ndarjen nga jeta të aktorit të madh Paulin Preka. Pinjolli i humorit shkodran do të mbetet pjesë e plejadës së aktorëve të shquar të teatrit dhe kinematografisë shqiptare.Me humorin e tij ai i dha ngjyra zymtësisë së jetës së shqiptarëve në vitet e regjimit komunist.
U prehtë në paqe!
