Drejtori i spitalit Rajonal Shkodër, Senad Halluni ka dhënë detaje të reja mbi ngjarjen tragjike që ndodhi në fshatin Mjedë, ku një fëmijë 3-vjeçar humbi jetën dhe motra e tij 7-vjeçare ndodhet në gjendje kritike.
Në një konferencë për mediat, Halluni i shprehu ngushëllime familjes dhe tregoi momentin e parë kur i mituri u paraqit në ambientet e spitalit.
Sipas drejtorit të spitalit, 3-vjeçari është paraqitur ditën e premte në orën 16:40 me shenja të të vjellave dhe nga mjekja roje është trajtuar për këto simptoma.
Halluni thekson gjithashtu faktin se të atit të fëmijës i është kërkuar që 3-vjeçari të shtrohet në spital, por ai ka refuzuar.
Pjesë nga fjala e Drejtorit të spitalit Rajonal Shkodër:
“Shpreh ngushëllimet për humbjen e jetës së 3 vjeçarit Omer Hasmegaj. Ai është paraqitur të premten në orën 16:40, me shenja të të vjellave. Nga mjekja roje është trajtuar për këto simptoma. Rreth orës 19 i është kërkuar familjes për t’u shtruar në spital. I ati ka vendosur firmën për të marr fëmijën dhe për të mos vazhduar trajtimin.
Më datë 22 ditën e shtunë në orën 9:40, 3- vjeçari ka ardhur në gjendje shumë të rëndë pothuajse pa jetë, me puls të ulët. Mjekët janë munduar të bëjnë reanimimin dhe për 45 minuta është bërë çdo përpjekje për ta mbajtur në jetë, por fatkeqësisht 3- vjeçari ka ndërruar jetë. Pas 30 minutash është paraqitur e motra, dhe stafi i pediatrisë ka vendosur t’a nisë me urgjencë drejt Tiranës. Janë lajmëruar organet kompetente, kua janë bërë procedurat, për të kryer autopsinë e cila është metoda më e saktë për vendosjen e diagnozës.”
Ka një përgjigje për diagnozën?
“Fakti që me të njëjtat shenja është edhe e motra, për të gjetur shkakun dhe diagnozën, nuk ka një përgjigje, por nga kontaktet që kam unë flitet insuficenca kardio respiratore.”
