Bashkia e Tiranës ka folur për ngjarjen e rëndë të Sharrës, tre javë pas vdekjes së 17 vjeçarit Ardit Gjoklaj. Pas akuzave të PD dhe rritjes së presionit publik, Bashkia reagon duke thënë se organet e drejtësisë po hetojnë dhe nëse kontraktori nuk ka zbatuar rregullat, të dënohet.
Theksojmë këtu se Kryetari Erion Veliaj është akuzuar se i ka dhënë në mënyrë klienteliste këtë punë Edurim Teqjes, funksionar partiak i PS, njëherësh pronar i kompanisë 3R që përpunonte plehrat në Sharrë.
Bashkia e Tiranës shkruan në një njoftim për mediat shpërndarë mesditën e sotme se “çdo ditë përballemi me sulme politike, të cilat nuk i shërbejnë as punës sonë të përditshme, as qytetit tonë. Këto sulme bëhen edhe më absurde kur vijnë pikërisht nga ata njerëz që për katër vite me radhë zgjodhën të flinin gjumë, duke e lënë qytetin në mëshirë të fatit e që për 4 vjet nuk zgjidhën, edhe pas shumë aksidenteve, çështjen e landfillit të tejmbushur të qytetit, i cili për faj të po këtyre njerëzve kishte degjeneruar në një fushë-betejë për grumbulluesit e mbetjeve”.
Më tej, Bashkia shprehet se duhet të zbardhet shpejt ngjarja ku humbi jetën 17 vjeçari. “Institucionet përgjegjëse kanë bërë shoqërimet e të implikuarve, janë duke hetuar dhe shpresojmë që e vërteta e kësaj ngjarje të trishtë të zbardhet sa më shpejtë”, citohet në njoftim.
Sipas Bashkisë së Tiranës është e pamundur të kontrollohen rreth 100 firma kontraktore që punojnë në gjithë territorin; në rrugë, në ujësjellësa, ndërtesa, ura, mbikalime, infrastrukturë arsimore, grumbullim mbetjesh, pastrim e shërbim. “Ne vendosim rregullat, çdo ofrues sherbimesh në qytet përgjigjet përpara ligjit për çdo shkelje të këtyre rregullave”, cilëson Bashkia e Tiranës në njoftimin për mediat.
Më tej, thotë Bashkia duhet të mbajë përgjegjësi kontraktori nëse shpallet fajtor. Në këtë rast kontraktori është firma 3R e Edurim Teqjes, ende në arrati. “Bashkia e Tiranës ka qenë dhe vazhdon të jetë në krah të institucioneve ligjzbatuese, duke ofruar të gjithë ndihmën për një hetim të plotë të kësaj ngjarjeje e vënë përpara përgjegjësisë cilindo kontraktor që nuk ka respektuar këto rregulla”, thuhet në njoftim. Teksa vijon: “Siç e kemi shprehur edhe në reagimet tona të mëparshme, në përfundim të hetimit, Bashkia e Tiranës do të zbatojë çdo përfundim, kërkesë apo rekomandim të organeve përkatëse. Por, na vjen keq të shohim se si për çdo fatkeqësi, aksident apo çdo moment të pafat, është gjithmonë Partia Demokratike, një parti e fatkeqësive historike të këtij qyteti e vendi, që mundohet të shfrytëzojë çdo situatë për kapital politik”
Ky reagim i Bashkisë vjen sot kur Gjykata e Apelit vendosi të lërë të lirë përgjegjësin e kompanisë. Ndërsa administratori, Edurim Teqja nuk është arrestuar edhe pse ka urdhër ndalimi nga prokuroria. Lexo ketu: Vdekja e Arditit në landifillin e Sharrës, del nga burgu përgjegjësi i firmës 3R
*Të foto: Erion Veliaj, Edurim Teqja në landfillin e Sharrës në muajin Mars
/Opinion.al
