Vdekja e 16-vjeçares Maria në Trikalla të Greqisë vijon të mbetet mister për autoritetet. Në fillim ngjarja u raportua si vetëvrasje por familja e vajzës kërkon hetimin e çështjes.
Ato u kërkojnë autoriteteve që të hetojnë rastin, ndërsa theksojnë se vajza e tyre nuk ka kryer vetevrasje.
Sipas mediave greke, kushëriri i 16-vjeçares ka dëshmuar në polici se rreth orës dy të mëngjesit kishin qenë afër shtëpisë së saj ndësa ajo shkëmbente mesazhe nga celulari i tij me dikë.
Rreth orës tre në mëngjes, të dy u larguan nga zona e tyre në drejtim të Sheshit Trikala.
Sipas informacioneve, atje takuan oficerin e policisë 27-vjeçar dhe më pas kushëriri i Marias u largua duke u kthyer në shtëpi, ndërsa pas disa orësh, 16-vjeçarja u gjet e vdekur.
“Isha në shtëpinë time kur ajo më thotë që të shkojmë tek sheshi kryesor së bashku për një shëtitje. E pyeta se çfarë do të bënte tjetër atje dhe ajo më tha që do të dilte me një të njohurin e saj. E pyeta se kush është dhe ajo më tha që ende nuk e njoh atë dhe se ai është nga Athina. Personi nga Athina e thirri dhe i tha ‘Unë jam këtu, ku je ti?’, ndërsa ajo ia ktheu: ‘Tani po vij’. Kur ai erdhi, unë nuk e pashë fare, ndërkohë që Maria më tha të largohesha. Unë u largova dhe nuk e di se çfarë ndodhi më pas. ‘Me sa di unë, ajo e ka parë atë për herë të parë një ditë më parë’”, tha kushëriri i 16-vjeçares për Mega.
Asgjë të re dhe asnjë provë nuk doli nga dëshmia e policit 27-vjeçar, para hetuesve me të cilin shqiptarja 16-vjeçare dyshohet se u takua pak para se të ndërronte jetë. Ndër të tjera, ai pretendonte se e mësoi ngjarjen tragjike nga media të nesërmen, duke shtuar se nuk dinte se çfarë kishte ndodhur, pasi kur u ndanë me njeri-tjetrin Maria nuk tregoi shenja shqetësimi.
Pavarësisht kësaj deklarate, prindërit e 16-vjeçares kërkojnë të hapen kamerat në zonë, me qëllim që të shohin Marian tek Kisha dhe personi apo personat që mund të kenë qenë me të.
Një pjesë e pikëpyetjeve priten të marrin përgjigje pasi të dali raporti mjekoligjor i cili pritet të përcaktojë shkakun e vdekjes. /Opinion.al
