Policia e shtetit ka proceduar 12 pronarë subjektesh në Durrës dhe Vlorë dhe ka liruar 2 mijë metra katrorë plazh të zaptuar në Durrës.
Në operacionin për evidentimin e informalitetit, evazionit fiskal në turizëm, ndërtim, hidrokarbure, mallra të akcizës dhe krimeve të tjera mjedisore, Specialistët për Hetimin e Krimit Ekonomik e Financiar në Durrës kanë nisur procedimin në gjendje të lirë për 6 shtetas banues në Durrës. Procedimi ndaj tyre filloi pasi nga kontrolli i ushtruar, u konstatua se ata kishin zënë me çadra plazhi, hapësirat publike në bregun e detit pa leje nga organet përkatëse.
Ndërkohë në Vlorë Policia janë proceduar penalisht 6 administratorë subjektesh në Radhimë dhe Himarë. Këto subjekte tregtare në plazhet e Radhimës dhe Gjipesë akuzohen se kanë ushtruar aktivitetin “Plazh Privat” me mungesë të theksuar dokumentacioni, nuk lëshonin kupona tatimorë dhe nuk kishin kontratë qiraje me Bashkitë përkatëse.
Mbi të proceduarit rëndojnë veprat penale “Zënia e hapësirave publike”, “Fshehja e të ardhurave”, “Moslëshimi i kuponit tatimor”, “Punësimi i paligjshëm” dhe “Pushtimi i tokës”. /Opinion.al
