Në të shtunën e gjashtëmbëdhjetë radhazi, “jelekverdhët” vijojnë protestat e tyre në Francë. Krahasuar me protestat paraardhëse, ka qenë një ditë më e qetë në Paris, ku gjithsesi policia ka ndaluar nëntë persona. Autoritetet kanë blinduar hyrjen për në Pallatin Elize si edhe në ministritë më të rëndësishme. Gjithashtu, është ngritur edhe një mur metalik për të bllokuar çdo mundësi kalimi për në “Place de la Concorde”.
Ndërkohë, protesta ka pasur edhe në qytete të tjera franceze, ku në Bordo shumë persona kanë mësyrë në stacionin e trenit, duke bllokuar për pak orë transportin hekurudhor. Ndërkohë në Lilë janë mbledhur mijëra protestues, duke u kërkuar edhe qytetarëve të vendeve fqinje që t’u bashkohen protestës. Edhe në qytetet e tjera si Marsejë, Nicë, Montpelier, Strasburg dhe Tuluzë ka pasur protesta, por me një intensitet më të ulët nga herët e kaluara.
Sipas një sondazhi të zhvilluar javën e kaluar, për herë të parë shumica e francezëve, 55%, mendojnë se protestat e “jelekverdhëve” duhet të përfundojnë./Opinion.al
