Kryetari i LSI, Petrit Vasili tha se LSI po bashkëjeton në kushte të panatyrshme me ministrat teknikë dhe me task-forcën e kryesuar nga zv/kryeministrja teknike Ledina Mandija. Kujtojmë se një pjesë e mirë e të larguarve nga administrata gjatë këtij muaji kanë qenë nga radhët e LSI-së.
Vasili e tha këtë në përgjigje të interesit të qytetarëve që sipas tij e kanë pyetur në rrjetet sociale se pse e paditën Ramën në prokurori për një deklaratë.
Statusi i Vasilit në facebook
Më kanë pyetur se pse shkuam në padi ndaj kryeministrit për thirrjen e punonjësve të Policisë së Shtetit për pjesëmarrje në fushatë elektorale, edhe pasi ai kërkoi ndjesë publike. Ja pse: Sepse nuk ka dy drejtësi.
Një drejtësi për kryeministrin që e kalon me një “më fal” dhe një drejtësi tjetër për specialistin e thjeshtë të një ndërmarrjeje publike, i cili mund të jetë pushuar menjëherë nga puna për një foto të gjetur diku nga task-forca me të cilën po bashkëjetojmë në kushte të panatyrshme.
