“Do të preferoje të ishe një nga të shumtit tek Arsenal apo një legjendë te Leicester?”. Jo, tifozët e skuadrës së Claudio Ranieri-t nuk e kanë marrë aspak mirë lajmin e fundit të merkatos. Jamie Vardy, sulmuesi zbulim i këtij sezoni të “Dhelprave”, është një hap larg veshjes së fanellës së “Topçinjve”, që mund ta mbyllin operacionin në orët e ardhshme duke paguar 38 milionë eurot që parashikohen në klauzolën për prishjen e kontratës. Komentet në rrjetet sociale, mes zemërimit dhe ironisë, nuk kanë vonuar.
Madje ka pasur nga ata që kanë postuar një fotografi me fanellën e lojtarit në vend të letrës higjienike. Një tifoz i ka komentuar te një mesazh i postuar nga vetë lojtari në Twitter 16 majin e kaluar (një fotografi e qytetit në festë për titullin e fituar) me komentin: “Ja, këta janë të gjithë njerëzit që ke zhgënjyer”. Zemërimi është kthyer në ligësi në disa raste: “Shpresoj që të qëndrosh jashtë fushës për 2 vite”, dhe kjo situatë nuk është pëlqyer aspak nga bashkëshortja e Vardy-it: “Mos më ofendoni, unë nuk kam lidhje me vendimet që merr bashkëshorti im. Nuk është e drejtë”.
