Ish-kryebashiaku i Durrësit, Vangjush Dako, i cili u lirua nga qelia disa javë më parë, është paraqitur sot në Gjykatën e Posaçme.
Brenda Gjykatës Dako ka dalë kundër qëndrimeve të SPAK që e akuzon për shpërdorim detyre në dy episode. Në dalje të seancës maratonë, Dako tha se nuk ka asnjë koment.
Ekspertët e pavarur sollën aktekspertizën në GJKKO, rreth kostos së ndërtimit të vijës bregdetare në Durrës që sipas Prokurorisë është dhjetëfishuar. Seanca e radhës për shpallje vendimi nëse çështja do të kalojë për gjykim ose jo është caktuar më 17 prill në orën 10:00.
Ekspertët kanë paraqitur një akt të ri ekspertimi sipas kërkesës së gjykatës çka ka ndeshur në kundërshtimin e avokatëve dhe vetë Vagjush Dakos të cilët kanë pretenduar se nuk ka patur abuzime me tenderin e shëtitores.
Dako ndodhet në masën e sigurisë “arrest shtëpie”. Gjykata e Posaçme mori vendimin për lirimin nga qelia të tij duke e çuar në arrest shtëpie më 27 shkurt për shkak të kalimit të afateve të paraburgimit. Vendimi u ankimua nga Prokuroria e Posaçme, e cila kërkoi rikthimin e ish-kryebashkiakut socialist në burg, por togat e zeza të Apelit vendosën ta linin në fuqi vendimin e Shkallës së Parë.
Aktekspertimi u bë për procedurën e prokurimit të shërbimit konsulencë për projektin e Promenadës Bregdetare dhe Plazhin publik nga Bërryli deri në Currila, të cilës iu rrit vlera me dhjetëfish duke i shkaktuar shtetit një dëm prej 18 milionë lekësh të reja. Episodi i dytë ka të bëjë me ndërtimin një pallati pa leje teksa leja u aprovua pasi përfundoi ndërtimi madje edhe pasi kishin hyrë blerësit.
