Louis van Gaal ka bërë të ditur se Adnan Januzaj ende nuk është gati për të luajtur, edhe përkundër se është rikthyer në stërvitje me skuadrën
Të dielën duke filluar nga ora 15:05, Manchester United pret në Old Trafford Arsenalin, ndeshje kjo që zhvillohet në kuadër të xhiros së 27-të në Premierligë.
Trajneri Louis van Gaal, e ka konfirmuar se David de Gea dhe Chris Smalling do të mungojnë ndaj Arsenalit, teksa gjithashtu edhe Antonio Valencia e Adnan Januzaj mund të mbeten jashtë për këtë derbi.
“I kemi edhe dy stërvitje deri te përballja, kështu që nuk mund të them shumë për rikthimin e lojtarëve sepse do të bëjmë gjithçka që është e mundur që të rikuperohen”, ka thënë Van Gaal.
“Valencia nuk është gati që të luaj, gjithashtu edhe Januzaj. Marcos Rojo ndoshta, por kjo varet edhe nga lojtarët tjerë”, ka shtuar Van Gaal.
“Është e sigurt se De Gea dhe Smalling nuk do të luajnë në këtë ndeshje, edhe përkundër se ne shpresonim për një gjë të tillë”, ka përfunduar trajneri holandez.
