Kryeministri Edi Rama është në një konferencë për mediat, bashkë me Ministren e Kulturës, Elva Margariti, për të folur për javët kulturore ndërkombëtare që do të nisin sot në Tiranë.
Gjatë kësaj konference Rama nuk i ka shpëtuar edhe pyetjes lidhur me procesin e zgjedhjes së Presidentit të Republikës dhe emrat e aluduar për kandidatë.
Pyetja e merrte shtysën nga deklarata e ish-kryeministrit Sali Berisha, i cili në një konferencë për mediat aludoi se një nga kandidatët për presidente ishte edhe shefja e tij e kabinetit, Vali Bizhga.
Rama u përgjigj duke thënë se ky proces stimulon shumë thashetheme dhe përmendjen e shumë emrave të personave që se kanë me dëshirë këtë gjë.
Pyetja: Ju i dhatë opozitës një javë kohë për të nisur procedurat parlamentare për Presidentin, ju si PS deri kur do ta prisni atë pjesë të PD-së që keni deklaruar se do të negocioni? Keni deklaruar se nuk do të ketë kandidatë nga tuajët, e keni fjalën për deputetët apo dhe për kabinetin tuaj. E them këtë sepse ka dalë emri i shefes së kabinetit tuaj, Vali Bizhga?
“Do të doja të mos e shfokusonim vëmendjen nga kjo gjë nismë, na duhet mbështetja juaj, shumë njerëz duhet të informohen në lidhje me këtë nismë, të zgjedhin dhe të marrin pjesë në të gjithë këtë seri javësh që fillojnë sot dhe mbarojnë në fund të vitit, me një ndërprerje, në mes, që është pushimi veror. Ky procesi i Presidentit stimulon vorbullën e thashethemeve. Shumë emra përzihen, madje pa dëshirën e personave fare, siç është rasti në fjalë. Përgjigja ime është negative“,-tha Rama./Opinion.al
