Detaje tronditëse dalin në dritë në lidhje me krimin e rëndë që ndodhi në Volos të Greqisë, ku një 50-vjeçar vrau me armë zjarri kunatin e tij, me dyshimin se ky i fundit i kishte përdhunuar vajzën. Ngjarja ndodhi mbrëmjen e së premtes.
Pasi 50-vjeçari Fatmir Tarellari ka mësuar nga e bija se 33-vjeçari e ka përdhunuar që në moshën 9-vjeçare, ndërsa së fundmi kishte arritur deri në pikën që ta shantazhonte se nëse nuk i jepte para, ai do publikonte video dhe foto të saj, ka planifikuar aktin e rëndë.
Pas sa më sipër, babai i vajzës 18-vjeçare, mësohet se ka inskenuar një plan, ndërsa është justifikuar te gruaja e tij se do të merrte të vëllanë e saj për t’i rregulluar një defekt në makinë.
Teksa me vete kishte një armë gjahu, me leje, 50-vjeçari mori në makinë kunatin e tij dhe në aksin që lidh Volosin me fabrikën e çimentos, në një shesh të izoluar, autori fiku makinën dhe qëlloi viktimën në fytyrë me tytën e armës. Kur viktima ka tentuar t’i marrë armën, 50-vjeçari e ka qëlluar atë, duke e lënë të vdekur.
Ishte një plumb që i mori jetën në vend 33-vjeçarit Erjon Pelivani. Më pas 50-vjeçari ka telefonuar autoritetet dhe ka treguar krimin që kishte kryer. Ndërkohë, oficerët pasi shkuan në vendngjarje, gjetën trupin e pajetë të të riut me plagë në fytyrë./Opinion.al
