Policia e Dibrës hedh poshtë pretendimet e familjes Alla se nuk po ruhen dhe se janë të rrezikuar.
Sipas Policisë, babai, nëna dhe vëllai i 20 vjeçares Anisa Alla nuk thonë të vërtetën kur deklarojnë se “pas mesnate nuk ka shërbime policore poshtë banesës së tyre”.
“Megjithëse Gjykata e Peshkopisë nuk ka vendosur ende për marrjen në mbrojtje të 5 pjesëtarëve të familjes Alla, dy grupe shërbimi, të përhershme, ndjekin çdo lëvizje të 20 vjeçares dhe familjarëve të saj” thonë burimet policore, të cilave u referohet gazeta Panorama.
“Ne kemi marrë të gjitha masat që pjesëtarët e kësaj familjeje të mos kenë asnjë problem”, thotë policia, duke shtuar se “nuk merremi me deklaratat e tyre, pasi po kërkojnë azil pas videoskandalit”.
“Ne kemi shoqëruar me persona civilë çdo ditë 20 vjeçaren dhe familjarët e tjerë. Ato nuk janë izoluar për asnjë moment në shtëpi. Kanë dalë dhe nuk kanë pasur asnjë problem. Shërbimet tona i ndjekin në distancë dhe bëjnë kujdes që ato të mos kenë probleme”, vijojnë më tej zyrtarë të policisë Dibër, që preferuan të mbeten anonim.
