Një 40-vjeçar është arrestuar nga policia e Fierit, pasi ushtronte profesionin e laborantit dentar, por ishte i papajisur me licencë.
Uniformat blu bëjnë me dije se arrestimi i tij u realizua në kuadër të operacionit policor të koduar “Multi”.
Shërbimet e Policisë konstatuan se ai kishte përshtatur një banesë të marrë me qira në lagjen “1 Maji” të Fierit, si laborator dentar dhe përdorte barna dhe pajisje, të dyshuara të rrezikshme për shëndetin e pacientëve.
Gjithashtu mësohet se nga kontrollet iu gjet një sasi kanabisi, të cilën e posedonte në laborator.
“Si rezultat i kontrolleve të përditshme, në subjekte të ndryshme ekonomike, në të gjithë territorin e qarkut, me qëllim verifikimin e zbatimit të ligjeve, specialistët për Hetimin e Krimeve Ekonomiko-Financiare të DVP Fier organizuan dhe finalizuan operacionin policor të koduar “Multi”, në kuadër të të cilit u kap në flagrancë dhe u vu në pranga shtetasi A. K., 40 vjeç, banues në Fier.
Shërbimet e Policisë konstatuan se ky shtetas kishte përshtatur një banesë të marrë me qira, në lagjen “1-Maji”, si laborator dentar, ku ushtronte profesionin e laborantit, i papajisur me licencën e nevojshme, si dhe përdorte barna dhe pajisje, të dyshuara të rrezikshme për shëndetin e pacientëve.
Gjithashtu, nga kontrollet në këtë ambient, u gjet një sasi e vogël lënde e dyshuar narkotike cannabis sativa. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme, për veprat penale “Fshehja e të ardhurave”, “Ushtrimi i aktivitetit pa licencë”, “Prodhimi dhe tregtimi i barnave dhe pajisjeve të falsifikuara ose të rrezikshme për jetën dhe shëndetin” dhe “Prodhimi dhe shitja e narkotikëve””, njofton policia./Opinion.al
