Në studion e emisionit “Opinion”, kryetari i Dhomës së Tregtisë dhe Industrisë Nikolin Jaka ka thënë se megjithë problemet që ekzistojnë, ka një përmirësim të dukshëm të sigurisë ushqimore që nga vitit 2015. Jaka ka treguar edhe problemet më të mëdha të sigurisë ushqimore, por duke shtuar se fabrikat e mëdha kontrollohen rreptësisht.
“Unë kam hyrë në këtë industri që në vitin 2015. Prej atëherë, përmirësimi është i ndjeshëm. Nga 2015 deri në 2019 ka goxha përmirësim. Por siguria nuk funksion siç duhet sepse ka nevojë për reformë AKU, nuk funksionon si duhet Instituti i Analizave. Gjithashtu edhe reforma që u nis në inspektim për të pasur trupa të kualifikuar, nuk është kaluar në nisma për ligjin. Duhet trupa inspektimi të pavarur. Nëse nuk bëhen këto, nuk mund të marrim produktin e duhur. Unë ju them se të gjitha stabilimentet e mëdha që prodhojnë në Shqipëri, janë në një kontroll të rreptë. Fabrikat kanë kontrolle të përmuajshme nga AKU, nga hyrja deri në daljen e produktit. Nëse ndodh në gjithë pikat e vogla, baxhot apo thertoret, atëherë siguria krijohet. Por ka abuzime edhe nga inspektorët”, është shprehur Nikolin Jaka./Opinion.al
