Sipas kësaj VKM-je, me numër 31359 e dates 16 Dhjetor 2015, të gjitha procedurat e eksportit dhe rieksportit pranë zyrave doganore të brendshme dhe me zyrë doganore dalëse të Degës Doganore Durrës, duhet të kryhen brenda disa orareve të caktuara.
Por është absurd orari i përcaktuar për disa degë doganore. Në degën e Shkodrës, Beratit dhe Korçës, doganierët janë të detyruar nga ky urdhër, që t’i mbyllin të gjitha procedurat brenda orës 10 të paradites. Degë të tjera si Lezha, Vlora, Fieri kanë si orar të detyruar orën 11 të paradites.
Absurditeti lidhet pikërisht me kohën që kërkon realizimi i një procedure dhe kohës që ka në dispozicion administrata doganore.
Pyetja që ngrihet nga ky urdhër: Si mund të përballojnë punonjësit doganorë fluksin e bizneseve që eksportojnë mallra, në vetëm 2 orë? Nga ana tjetër, kjo VKM i detyron të bizneset të paraqiten në doganë në varësi të orareve të përcaktuara më sipër. Ky urdhër vlen vetëm për eksportet, çka do të thotë që vlen për binzeset shqiptare që eksportojnë mallra jashtë, ndërsa për mallrat e huaja që hyjnë në vend, nuk ka një kufizim të tillë.
Dy orë, sepse referuar orareve të bëra publike në faqen zyrtare të Drejtorisë së Doganave www.dogana.gov.al, orari zyrtar i punës për degët në fjalë fillon në orën 8 të mëngjesit , përveç atyre në pikat kufitare.
Më shumë se sa e disiplinon dhe planifikon lëvizjen e mallrave, a nuk e dëmton kjo VKM punën e bizneseve që operojnë në bashkëpunim me këto degë doganore?
Është e pamundur që një biznes të programojë kalimin e mallrave brënda këtij presioni kohor, pasi ka kosto në kohë, organizim të transportit dhe ekonominë e tij.
