Ashtu si Flamur Noka në komisionin e Ekonomisë, edhe deputeti Ervin Salianji deklaroi nga dera e prokurorisë se ka të tjera materiale që implikojnë vëllanë e ministrit, Fatmir Xhafaj në trafikun e hashsahit.
“Për të gjitha deklarimet që kemi thënë në prokurori nuk mund të flasim sepse përbëjnë shkelje (nxirret sekreti hetimor), por mund tju them se ka një deklarim nga gazetari Jetmir Olldashi i cili më ka sjellë pjesën e audio-përgjimit, jo vetëm pjesën e parë që është publikuar nga PD, por edhe pjesë tjetër ku duket qartë që personat lidhur me krimin dhe me Agron Xhafajn bëjnë trafik kanabis”, u shpreh deputeti demokrat.
Më tej ai deklaroi se “në audio-përgjimin e ri (ende të pa shfaqur) bashkëpunëtori X, Albert Veliu dhe një trafikant tjetër i cili është bashkëpunëtor apo “zari” i Agron Xhafajt flitet qartazi për “10 kile drogë mos më hajde, unë flas për 100 kile e sipër”.
Është e qartë pra se qeveria është e përfshirë në mbrojtjen e krimit. Agron Xhafaj u largua nga Shqipëria për të mos u zbuluar trafiku që ai ka bërë, tha Salianji.
