Policia e Malit të Zi ka goditur një rrjet ndërkombëtar të trafikimit të drogës. Radio Televizioni Shtetëror raporton se në Ulqin janë sekuestruar 1.5 tonë drogë e llojit kanabis sativa që do të trafikohej me skaf. Në lidhje me këtë ngjarje janë arrestuar dy shqiptarë.
Ndalimi i tyre është bërë pas një ndjekje të gjatë në hapësirën detare të Ulqinit në Mal të Zi. Ndërkohë, nga mediat e Ulqinit bëhet me dije se kanabisi ishte ndarë në 78 çanta dhe sasia e drogës dyshohet se kishte hyrë nga Shqipëria.
Dyshohet se destinacioni i dy shqiptarëve që drejtonin skafin ishte bregdeti italian. Hetimet për këtë ngjarje vazhdojnë nga autoritetet e Malit të Zi.
