Majat e maleve, lumenjtë e kristaltë dhe ujëvarat e Shqipërisë janë ende të paeksploruara nga turistët, shkruan një artikul i publikuar në blogun e udhëtimeve “Rove.me”.
Në veri të Shqipërisë, larg qytetërimit, shtrihet fshati i Thethit, “porta” e Parkut Kombëtar të Thethit.
Parku Kombëtar i Thethit është pjesë përbërëse e Parkut Kombëtar të Alpeve Shqiptare.
Unioni Ndërkombëtar për Ruajtjen e Natyrës (IUCN) e ka renditur Parkun Kombëtar të Thethit si një park të Kategorisë II.
Rajoni është identifikuar gjithashtu si një zonë e rëndësishme e shpendëve dhe bimëve. Zona ka tërhequr vëmendjen e shumë turistëve, dhe vizitohet gjatë 12 muajve të vitit, falë bukurisë së jashtëzakonshme të natyrës, duke përfshirë Alpet Shqiptare, Kanionin e Grunasit dhe xhevahirin e parkut – Ujëvarën e Grunasit. Ujëvarën artikulli e cilëson si vendi më romantik në Shqipëri.
Kjo ujëvarë është shpallur Monument Natyre dhe është nën mbrojtjen e shtetit. Ajo ka një lartësi prej 30 metrash.
E veçanta e saj është se i gjithë uji i saj vjen ekskluzivisht nga bora. Artikulli rekomandon se koha më e mirë për të vizituar Parkun Kombëtar të Thethit është stina e butë midis pranverës dhe vjeshtës, përkatësisht nga Marsi deri në Nëntor.
Klan News
