TIRANË- Kryeministri Edi Rama dhe Kryeparlamentari ilir Meta kanë qendruar për plot dy orë në vilën 30 në Tiranë. Në fokus ka qenë reforma në drejtësi. Ata folën vetë për mediat pas takimit, ku u duk se e kishin gjetur dakordësinë.
Rama e nisi me një batutë me median deklaratën e tij, më pas sqaroi qendrimin e përbashkët:
“Më vjen keq që keni pritur kaq gjatë, po nuk ndihëm fajtor se nuk ju lajmëroi njeri. Dëshira e pasioni që keni për punën ka koston e vet. Ne bëmë një takim për të diskutuar mbi një sërë çështjesh, natyrshëm se është mbyllja e një viti, dhe fillon një vit, ku kemi disa objektiva.
Një ndër objektivat kryesore është të çojmë përpara reformën në drejtësi. Ndamë me njëri-tjetrin kënaqësinë që trendit të reformës iu bashkua edhe PD. Jam i kënaqur, se kaluan shumë kohë duke pritur të ndalej treni, e hipën vetë në tren. Ky është një lajm shumë i mirë.
Raporti i Komisionit të Venecias na gjen të gjithëve shumë të kënaqur. Tani duhet ta finalizojmë këtë proces. Duhet tët punojmë për një proces gjithëpërfshirës, të thellë dhe cilësor. Dhe duhet të marrim të gjithë së bashku përgjegjësinë e madhe për t’i dhënë vendit reformën e shumëpritur”, tha kryeministri Rama.
Ndërsa Meta, tha se deri në pranverë e bëjmë reformën:
“Duhet të vlerësojmë punë e madhe të bërë deri më tani, ku ka patur një proces gjithëpërfshirës të gjithë forcave politike, përfshirë edhe opozitën që kontribuoi me propozimet e saj. Do të falënderoja edhe ekspertët ndërkombëtarë për ndihmën e mbështetjen e tyre.
Fakti që të gjithë aktorët politikë, janë të kënaqur me vlerësimet e këtij komisioni, tregon që puna jonë për të ecur më shpejt për kurorëzimin e kësaj reforme në pranverë është plotësisht e realizueshme.
Në këtë mënyrë ne do të japim një përgjigje mjaft të rëndësishme dhe pozitive për qytetarët tanë që kërkojnë që në 2016 të jetojnë në një vend më të drejtë, më të sigurt dhe ligjor”, tha Meta.
Në këtë takim kanë qenë të pranishëm edhe ministri i Drejtësisë, Ylli Manjani, dhe deputetët Gramoz Ruçi dhe Petrit Vasili.
