UEFA akordoi 200,000 euro për të ndihmuar ekipet e emergjencës pas tërmeteve në Turqi dhe Siri, lëkundje që ju kanë marrë jetën më shumë se 28 mijë personave. Turqia është vendi që do të presë finalen e Ligës së Kampionëve në qershor dhe organizata evropiane e futbollit u zotua gjithashtu të organizojë më shumë aktivitete për mbledhjen e fondeve në ditët para finales më 10 qershor në Stamboll.
UEFA po koordinon gjithashtu punën midis 55 shoqatave të saj anëtare për të kontribuar në një fond të ndihmës ndaj fatkeqësive. Donacionet fillestare përfshinin 150,000 euro nga UEFA për Federatën Turke të Futbollit dhe 50,000 euro të kombinuara për bamirësitë ndaj fëmijëve me “UEFA Foundation for Children” për të mbështetur dy organizata që punojnë në zonën e fatkeqësisë në Turqinë jugore dhe Siri.
Momente heshtjeje do të mbahen para ndeshjeve javën e ardhshme në Champions League, Europa League dhe Europa Conference League. Një ndeshje e kompeticionit evropian do të zhvillohet në Turqi të enjten. Trabzonspor do të presë Baselin në raundin e playoff-it të Ligës së Konferencës dhe lojtarët do të mbajnë shirita të zinj.
