Një çift australian ka folur për momentin “traumatik”, kur trupi i një pasagjeri të vdekur u vendos pranë tyre në një fluturim të Qatar Airways.
Mitchell Ring dhe Jennifer Colin, të cilët po udhëtonin për në Venecia për një pushim ëndrrash, thanë se një grua kishte vdekur në rreshtin pranë tyre gjatë fluturimit nga Melburni në Doha.
Nuk dihen ende arsyet e vdekjes së papritur të pasagjeres.
Çifti thotë se ekuipazhi i kabinës e vendosi kufomën e saj, të mbuluar me batanije, pranë zotit Ring për katër orët e mbetura të fluturimit pa ofruar ta lëviznin, pavarësisht se kishte vende bosh.
“Fatkeqësisht, zonja nuk mundi të shpëtohej, gjë që ishte shumë e tmerrshme për t’u parë”, tha Ring.
Ndërkohë në një deklaratë për NBC News, Qatar Airways tha:
“Mendimet tona në radhë të parë janë me familjen e pasagjeres që fatkeqësisht vdiq në bordin e fluturimit tonë.
Ne kërkojmë ndjesë për çdo shqetësim që mund të ketë shkaktuar ky incident, dhe jemi në proces të kontaktimit të pasagjerëve në përputhje me politikat dhe procedurat tona.”
