Ka ndërruar jetë njëri prej dy personave të cilët u zunë poshtë nga shembja e tarracës së banesës në fshatin Qerret.
Viktimë ka mbetur Shaban Shehu, 55-vjeç i cili është pronari i shtëpisë dhe është plagosur Bert Roshi, 27-vjeç i cili ka qenë i punësuar nga 55-vjeçari.
Sipas policisë të dy personat janë nxjerrë me shenja jete nga masivi i tarracës, por rrugës për në spital Shehu ka ndërruar jetë.
Mësohet se dy personat kanë qenë duke kryer punime ndërtimi dhe për pasojë është shembur tarraca, e cila ika zënë poshtë.
“Rreth orës 13:15, në fshatin Qerret, është shembur tarraca e banesës së shtetasit Sh. Sh., rreth 55 vjeç, dhe ka zënë poshtë shtetasin Sh. Sh. dhe shtetasin A. R., 27 vjeç (i punësuar nga shtetasi Sh. Sh.), të cilët po kryenin punime ndërtimi.
Shërbimet e Policisë dhe ato zjarrfikëse, të cilat kanë shkuar menjëherë në vendin e ngjarjes, kanë bërë të mundur nxjerrjen nga rrënojat, të të 2 shtetasve. Shtetasi Sh. Sh. (pronari i banesës), për shkak të dëmtimeve, ka humbur jetën, ndërsa shtetasi A. R. është transportuar menjëherë në spital dhe po merr asistencë mjekësore, jashtë rrezikut për jetën.
Grupi hetimor ndodhet në vendngjarje dhe po punon për sqarimin e rrethanave të kësaj ngjarjeje”, thuhet në njoftimin e policisë./Opinion.al
