Një pikturë e humbur e një artisti të famshëm italian që u gjet në kuzhinën e një gruaje të moshuar franceze është shitur në ankand për 24 milion euro, duke vendosur kështu një rekord të ri.
Krishti i Tallur, nga artisti i para Rilindjes, Cimabue, u zbulua muajin e kaluar në Francën veriore.
Piktura pritej të shitej për 6 milion euro në ankand, por oferta fituese tejkaloi shumë pritshmëritë
Acteon Auction House tha se shuma e paguar nga një blerës anonim nga Franca veriore, ishte një rekord i ri botëror për një pikturë mesjetare të shitur në ankand.
“Kur një punë unike e një piktori aq të rrallë sa Cimabue vjen në treg, duhet të jesh gati për surpriza”, tha drejtuesi i ankandit Dominique Le Coent, për Reuters.
Për vite me radhë, piktura varej mbi një vatër në një kuzhinë në qytetin e Compiègne. Ajo u zbulua nga një drejtues ankandesh, i cili këshilloi pronarin e saj që ta vlerësonte nga ekspertë. Pronari besonte se ishte një ikonë e vjetër fetare me pak vlerë. Testimet u kryen në veprën artistike duke përdorur dritën infra të kuqe për të përcaktuar ngjashmëritë me veprat e piktorit italian Cimabue, i njohur edhe si Cenni di Pepo.
Lindur në qytetin e Firences, ai ishte aktiv në fund të shekullit të 13 dhe fillimit të shekullit të 14 – një figurë kalimtare midis artit të stilizuar të periudhës mesjetare dhe veprave më natyraliste të Rilindjes.
Besohet se është pjesë e një pune të madhe me skena të pikturuara të ndara në disa panele që daton nga viti 1280 dhe që përshkruan pasionin dhe kryqëzimin e Krishtit. Dy skena të tjera nga e njëjta seri Cimabue mund të shihen në Galerinë Kombëtare të Londrës, dhe Koleksionin Frick në New York. /Opinion.al
