Autoritetet në Kramatorsk identifikuan dy nga viktimat e sulmit të mbrëmshëm, të cilat janë binjaket 14-vjeçare Yuliya dhe Anna Aksenchenko.
Në një postim në Telegram, këshilli i qytetit i shprehu ngushëllimet prindërve të vajzave, duke thënë se “një raketë ruse ndaloi rrahjet e zemrave të dy engjëjve”.
“Ne ndajmë dhimbjen e familjes suaj dhe së bashku me ju përulim kokën në pikëllim të thellë”, thuhet në njoftim.
Trupat e tyre u nxorën nga rrënojat e restorantit së bashku me nëntë trupa të tjerë, përfshirë atë të një djali 17-vjeçar.
Anna dhe Yuliya Aksenchenko sapo kishin mbaruar shkollën në Kramatorsk. Ato do të mbushnin 15 vjeç më 4 shtator. Mësuesja e tyre e matematikës, Lyudmila Osadcha, i quajti ato studente të zellshme. Ajo shpjegoi se të dyja ishin shumë të mira edhe në vizatim.
Pas fillimit të pushtimit rus, Anna dhe Yuliya ishin detyruar të largoheshin nga Kramatorsk, i cili është një nga qytetet më të shkatërruara nga lufta, pasi është disa dhjetëra kilometra nga fronti i Bakhmutit.
Dy vajzat ishin shpërngulur në fshatin Dobropilja. Prej këtu ato studionin nga distanca. “Ato kishin ardhur në qytet me pushime për të parë nënën e tyre, e cila punon në një klinikë lokale. Fizikisht ishin shumë të ngjashme, por karakteret e tyre ishin të ndryshëm. Anna ishte më e drejtpërdrejtë dhe Yuliya ishte pak më e qetë. Anna e ka mbështetur dhe ndihmuar gjithmonë”, tha mësuesja e tyre./Opinion.al
