Ngjarja e rëndë e ndodhur ditën e djeshme në Florida të Shteteve të Bashkuara të Amerikës, ku 34-vjeçari Renato Muhaj, ka vrarë ish-bashkëshorten e tij Suela Saliaj, 32 vjeç, ka shokuar banorët e fshatit Ngraçan në Mallakastër, ku e ndjera ka kaluar fëmijërinë e saj.
Me lot në sy, banorët tregojnë për gazetarët se vajza dhe familja e saj ishin njerëz tepër të nderuar në zonë dhe nuk mendonin kurrë se marresa e saj do të kishte një fund të tillë tragjik.
Banori 1: E njohim, e kemi pasur komshi. Tani më thatë që është vrarë në Amerikë vajza e Mukës. Unë Mukën e kam njohur njeri të mirë. Ka punuar infermier këtu dhe më pas në Fier. Nga Fieri, më pas i doli lotaria dhe shkoi në Amerikë. Më tej nuk di gjë unë. Për fëmijët e Mukës, nuk e di se nuk i njoh.
Banori 2: Një familje shumë e mirë dhe kur e dëgjuam lajmin, u befasuam. Ka qenë një vajzë shumë e mirë, jam rritur me të atin e vajzës. Ata ishin të ndarë në Amerikë, më tej nuk di, vetëm se flasim kot. Këtej thanë se ai është nga Mallakastra, fshati i Gjerë, se si është e vërteta ne nuk e dimë, po vajza ishte shumë e mirë sepse luante me fëmijët tanë. Ata kanë 15 vjet që kanë ikur.
Një banore tregon se e ndjera, Suela Saliaj ishte rritur së bashku me vajzat e saj, ndërkohë që ende ruanin lidhje në rrjetet sociale.
Pyetje: Vajza e ndjerë është mikeshë e vajzave tuaja. Sa ju ka shokuar kjo ngjarje?
Banorja: Jemi ndjerë shumë keq, kam qarë. Vajza ma dha lajmin, pastaj për t’u siguruar, mora një shoqen time që e ka të afërt dhe ajo për t’u siguruar më tepër.
Anila Sefa: Pra ju e mbani mend të vogël kur ishte këtu në fshat?
Banorja: Komunikonin në rrjetet sociale. Vajza më tha se ishte 1 vit a 2 që i kishte hequr fotot që kishte me burrin dhe tha që “unë nuk e ngacmova dhe e mendova vetë që ajo ishte ndarë.” Ishte vajzë shumë e mirë, punonte në bankë dhe atje kishte marrë certifikata të ndryshme, vlerësim për punë. Ishte vajzë e mirë shumë. Ai siç duket kishte dashur që të merrte vajzë, punë e tij, kush e di.
Në Ngraçan, banesa e familjes Saliaj është e mbyllur pasi prej vitesh aty nuk banon askush, teksa tek të gjithë banorët kanë mbetur tashmë vetëm kujtimet e mira dhe dhimbja për vajzën e vrarë nga ish-bashkëshorti.
Shkaqet e vrasjes nuk dihen ende, por çifti jetonte në vende të ndara nga njëri-tjetri./tvklan
