Trupi i pajetë i Arben Lleshit, i cili u vra brenda qelisë nga i dënuari Sokol Mjacaj në 15 dhjetor ndodhen ende në morg.
Mësohet se asnjë familjar i tij nuk është paraqitur për të tërhequr trupin e pajetë. Ndërkohë sipas procedurave nëse brenda një afati prej dy muajsh nuk paraqitet askush, varrimi bëhet nga bashkia.
Ndërkohë burime për gazetaren Klodiana Lala bëjnë me dije se familja Lleshi nga fshati Rukaj i Burrelit deri më tani nuk ka marrë vendim për ta tërhequr trupin, për shkak se sipas disa burimeve, ka marrë sinjale se fisi me të cilin është në hasmëri mund të vijojë hakmarrjen.
Arben Lleshi ishte dënuar me burgim të përjetshëm për vrasjen dhe më pas djegien e trupit të pajetë të Agim Hoxhës në 2012 në Britaninë e Madhe. Lleshi u vra brenda qelisë së tij në burgun e sigurisë së lartë ne Peqin nga Sokol Mjacaj edhe ky i dënuar me burg përjetë për vrasjen e dy turistëve cekë gjatë një tentativë grabitje në 2015.
Ekzekutimi i Arben Lleshit dyshohet të jetë kryer për motive gjakmarrje.
