Gjykata e Durrësit ka vendosur masen arrest me burg për dy inspektoret tatimorë të Drejtorisë se Përgjithshme që u arrestuan tre ditë më parë për mitmarrje. Gentian Elezin 29 vjeç dhe Artan Kroj 37 vjeç akuzohen për “korrupsion pasiv dhe aktiv i personave që ushtrojnë funksione publike” si dhe “shpërdorim të detyrës”.
Ata u arrestuan tre ditë më parë nga policia e Durrësit pas një hetimi proaktiv 3-mujor. Sipas hetimeve, dy të arrestuarit, në bashkëpunim edhe me një inspektor tjetër të shpallur në kërkim, shpërdoronin detyrën dhe ju merrnin ryshfet bizneseve gjatë inspektimit të tyre, shuma në vlera monetare që shkonin deri në 200.000 lek për çdo rast.
Kujtojmë që Artan Kroj ishte edhe kryetar i Partisë Socialiste për njësinë nr 3, ndërsa deputeti demokrat Myslym Murrizi kishte denoncuar faktin që ai kishte ndërruar dhe emrin, pasi më parë kishte qenë i dënuar me 7 vite burg për trafik droge në Greqi.
