Pëllumb Marnikollaj vdiq vdiq në rrethana misterioze në Greqi ndërsa ndodhej i arrestuar, por familjarët e tij ende janë në kërkim të drejtësisë.
Familjarë dhe të afërm të shqiptarit të vrarë kanë protestuar sot para ambasadës greke në Tiranë.
“Na e vranë Pëllumbin, “U treguat të pabesë”, “Kjo nuk është drejtësi” , ishin mesazhet që lexoheshin në pankartat që mbanin në duar..
“Duam drejtësi, hetim të plotë, të gjithanshëm dhe të shpejtë, të zbardhet e vërteta për vdekjen e djalit në policinë greke” ka thënë babai i Pëllumbit. Ai thotë se familjarët nuk do të ndalen deri sa të marrin një përgjigje nga hetimet e nisura.
“Ne kërkojmë nga ambasada greke në Tiranë shpejtim të procedurave për hetimin” tha ai. Të afërmit e 29vjeçari Pëllumb Marnikollaj bënë më herët një kërkesë pranë Drejtorisë Vendore të Policisë Tiranë, me qëllim lejimin e organizimit të këtij tubimi.
Marnikollaj vdiq në ambientet e policisë në Athinë, në fillim të muajit gusht pasi ndodhej me masën detyrim paraqitjen pas shlyerjes së dënimit me 7 vite burg për vjedhje.
Sipas policisë, i riu është hedhur nga dritarja e komisariatit, ndërsa familjarët e tij pretendojnë se, i riu është dhunuar barbarisht dhe për pasojë ka gjetur dhe vdekjen.
Nga ekspertiza rezultoi se në trupin e tij ishin vërejtur shenja dhune pasi kishte dëmtime në kokë dhe hemorragji të brendshme që mund të kenë ardhur nga rënia nga një lartësi e madhe.
