Kryeministrja e Danimarkës, Mette Frederiksen raportohet se ka marrë lëndime të lehta pas sulmit nga një burrë në qendër të Kopenhagës
Ajo u godit në qendër të kryeqytetit teksa ishte duke marrë pjesë në një ngjarje për zgjedhjet e Parlamentit Evropian.
Ka qenë zyra e saj e shtypit, ajo që bëri të ditur gjendjen e kryeministres.
‘Kryeministrja është në gjendje të mirë shëndetësore, por ajo është e tronditur nga incidenti”, thuhet në një njoftim të lëshuar nga zyra e saj.
Në njoftim bëhet e ditur gjithashtu se Frederiksen është dërguar menjëherë në spital, për një kontroll mjekësor pas incidentit.
Autori ishte një 39-vjeçar, i cili pritet të dalë para gjykatës për tu marrë në pyetje.
As policia dhe as kryeministria ende nuk kanë bërë të ditur motivet e sulmit.
Sulmi ndaj kryeministres daneze u dënua nga disa liderë evropianë dhe vjen teksa danezët përgatiten të shkojnë në kutitë e votimit të dielën për zgjedhjet evropiane.
