Një gjykatë në qytetin rus të Samaras ka dënuar këngëtarin Edouard Charlotte me pesë vite e gjysmë burg pasi shprehu hapur kritika ndaj pushtimit të Ukrainës nëpërmjet videove të postuara në internet.
Gjykata në vendlindjen e 26-vjeçarit e shpalli atë fajtor për “fyerje publike të ndjenjave fetare të besimtarëve” dhe “rivendosje të nazizmit”, njoftoi agjencia shtetërore e lajmeve Ria Novosti.
Këngëtari, i cili është i njohur në mesin e të rinjve, publikoi një videoklip në qershor 2023, në të cilin digjte ID-në e tij ruse në shenjë proteste ndaj pushtimit rus të Ukrainës.
Në videoklipe të tjera ai u pa duke grisur një fjongo me vija portokalli dhe të zeza në formën e një “Z”, simboli i forcave të armatosura ruse, ose duke luajtur me foton e Patriarkut Ortodoks Rus Kirill, i cili kishte mbështetur pushtimin e Ukrainës.
Pas fillimit të luftës, këngëtari u largua nga Rusia për t’u vendosur në Armeni, por më vonë u kthye dhe u arrestua në nëntor 2023 sapo mbërriti në aeroportin e Shën Petersburgut.
Gjatë gjykimit, ai u deklarua fajtor dhe u shpreh i penduar për veprimet e tij. Që nga fillimi i pushtimit rus të Ukrainës më 24 shkurt 2022, mijëra rusë janë ndëshkuar, kërcënuar ose burgosur pasi kanë shprehur hapur kundërshtinë e tyre ndaj luftës.
Po ashtu janë shtuar edhe gjyqet për “terrorizëm”, “sabotim”, “tradhti” apo “spiunazh” dhe në shumicën e rasteve shqiptohen dënime shumë të rënda.
