Detaje të reja janë mësuar nga ngjarja e ndodhur pasditen e djeshme në Tiranë, ku në ambientet e një lokali në zonën e Laprakës 40-vjeçari Elton (Altin) Mergjyshi plagosi me thikë tre persona duke i lënë të plagosur.
Mergjyshi qëlloi me thikë 64-vjeçarin Viktor Rrapollari në zemër, Roxhersa Rrapollari, 40 vjeçe dhe bashkëshortin e saj italian Massimo Sorvillo, 47, vjeç.
Nga dëshmia e dhënë para autoriteteve nga 40-vjeçarja dhe 47-vjeçari, Elton Mergjyshi sapo kishte shkuar te lokali që kishte marrë me qera shtetasi italian, fillimisht ka debatuar me atë duke i kërkuar llogari pse e kishte hequr nga puna.
Në debat e sipër ai ka nxjerr thikën dhe ka plagosur fillimisht Viktor Rrapollari, pasi ka dashur të ndërhyjë për të qetësuar situatën.
Sipas dëshmisë së vajzës së tij, kur ka parë të atin të plagosur ka ndërhyrë dhe në këtë moment agresori e ka qëlluar në dorë.
Më pas Mergjyshi ka plagosur në kraharor italianin Massimo Sorvillo. Pas kësaj ngjarje, 47-vjeçari italian ka marrë automjetin e tij me targa italiane dhe ka shkuar vetë në Spitalin e Traumës bashkë me bashkëshorten dhe babain e saj.
Dëshmia e 64-vjeçarit Viktor Rrapollari nuk është marrë ende nga grupi hetimor pasi është në gjendje më të rëndë se dy të plagosurit e tjerë. Vetë italiani Sorvillo ka deklaruar për policinë se e kishte pushuar pasi nuk i pëlqente puna e tij.
Ndërkohë, policia ende nuk ka mundur të arrestojë autorin e ngjarjes.
