Dy shqiptarë një burrë dhe një grua u arrestuan mëngjesin e së dielës në Ravenna të Italisë, për një episod grabitjeje të ndodhur në Fornace Zarattini, një lagje në periferi të qytetit që u prek më shumë nga përmbytjet e ditëve të fundit.
Sipas asaj që shkruajnë mediat italiane, shqiptarët ishin paraqitur para një çifti të moshuar duke iu ofruar disponueshmërinë e tyre për t’u bashkuar me vullnetarët e tjerë të angazhuar në heqjen e baltës nga shtëpia e tyre.
Por qëllimi i çiftit shqiptar, sipas asaj që u konstatua më vonë, nuk ishte t’i ndihmonin, por të grabisnin në banesën e të moshuarve.
Pas largimit të vullnetarëve, dy pronarët zbuluan se në shtëpi mungonte një shumë e madhe parash dhe menjëherë lajmëruan policët që ndodheshin aty pranë.
Në një kohë të shkurtër agjentët kanë arritur të identifikojnë çiftin e dyshuar të hajdutëve, burrë dhe grua me origjinë shqiptare.
Të dyve iu gjetën ende në posedim rreth gjashtë mijë euro para të gatshme të vjedhura nga brenda shtëpisë.
Ata u arrestuan dhe u vunë në dispozicion të autoritetit gjyqësor të Ravenës.
