Detaje të reja dalin në dritë lidhur me atentatin e ndodhur sot në Athinë, ku një shqiptar mbeti i vdekur e një tjetër i plagosur.
Mediat greke shkruajnë se nga mënyra se si është realizuar atentati, duket se autorët e kishin planifikuar sulmin dhe prisnin momentin e duhur.
Para krimit ata vodhën një makinë nga Athina, u drejtuan për në zonë, iu afruan viktimave dhe filluan të qëllojnë. Sulmi ndodhi jashtë një dyqani në kryqëzimin e rrugëve Aristotelous dhe Komotinit, ku autorët qëlluan me gjakftohtësi mbi viktimën dhe më pas u larguan.
Krahas 45-vjecarit Irakli Davella nga fshati Mesopotam i Bashkisë Finiq, i cili mbeti i vrarë, i plagosur rëndë ka mbetur edhe një shqiptar i identifikuar si Edi Lulo 46 vjeç.
Policia beson se bëhet fjalë për një larje hesapesh, nisur nga e kaluara e 45-vjeçarit, i cili dyshohet se ka lidhje me tre figura të mafias, të cilët janë vrarë në luftën e ndezur mes grupeve rivale të mafias greke.
Nuk dihet ende se kush ka qenë objektiv i atentatit, pasi edhe Davella rezulton i përfshirë në një grup kriminal shqiptaro-grek, i cili prej vitesh vepronte në Athinë dhe drejtohej nga të ashtuquajturit “kumbarë të natës”.
Irakli Davella rezulton të ketë marrë nënshtetësi greke në vitin 2009. Ai është pronar i një lokali në zonën e Peristerit në Athinë dhe gjatë verës jepte edhe automjete me qira në ishujt grekë.
I plagosuri kishte ardhur së fundi në Greqi nga Dubai, për të cilin hetuesit besojnë se ka luajtur rol në pritën vrasëse. Me fjalë të tjera, ata dyshojnë se ndoshta ardhja e tij në Greqi ka ndodhur për një arsye specifike dhe ka mobilizuar një grup rival, i cili ka dashur ta largojë nga rruga.
Hetimi i policisë greke për ekzekutimin mafioz është duke u zhvilluar, me synimin për të arritur në gjurmët e autorëve të kësaj ngjarje./Opinion.al
