Një aksident i rëndë u shënua rreth orës 13:00 në qytetin e Burrelit.
Një automjet tip “Benz” përplasi 4 persona në vendin e quajtur “ish-grumbullimi”.
Sipas policisë dyshohet se drejtuesi ka humbur kontrollin mbi mjet duke dalë nga rruga ku fillimisht është përplasur me koshin e mbeturinave dhe ka marrë përpara katër personat që ndodheshin në trotuar duke i plagosur rëndë.
Pasi ka shkaktuar aksidentin, policia njoftoi se drejtuesi i mjetit, një 28-vjeçar me iniciale Y.Xh., u largua nga vendi i ngjarjes dhe u shpall në kërkim. Ai u vu në pranga rreth 2 orë pas ngjarjes. Bashkë me të, në polici u shoqërua edhe një tjetër person, i cili e ndihmoi 28-vjeçarit të largohej me makinë nga vendi i ngjarjes.
Tre të plagosurit, mes tyre një fëmijë janë dërguar me urgjencë drejt spitalit të Traumës në Tiranë, ndërsa personi i katërt i cili është shofer i mjetit të pastrimit të Bashkisë dhe në atë moment po ndërronte gomën e mjetit, po merr ndihmë mjekësore në spitalin e Burrelit.
Grupi hetimor ndodhet në vendin e ngjarjes për të zbardhur shkaqet e vërteta të aksidentit të rëndë, ndërsa paraprakisht dyshohet se shkak ka qenë shpejtësia e lartë me të cilën lëvizte mjeti tip “Benz”./tvklan
