Deputetja demokrate, Flutura Açka, ka dhënë një deklaratë për mediat pas përplasjes me koleget e saj demokratë Flamur Noka dhe Gazment Bardhi, në Komisionin e Medias.
Açka u shpreh se kolegët e saj kërkojnë ta mbajnë parlamentin në kaos, por vetë ajo tha se e sheh këtë si një gjest jo të mire.
Sipas Açkës, ‘kjo formë e të bërit opozitë nuk na ka nxjerrë në dritë’.
“Sot përballem me një përplasje me kolegët e mi që mendojnë se ne duhet të mbajmë në kaos parlamentin. Personalisht e shoh si një gjest jo të mirë dhe jashtë detyrës time si deputetë të dal dhe të bërtas nëpër korridor dhe mos tregoj ku e ka plagën kjo qeveri, çfarë vjedh dhe ku vjedh.
Kjo ka qenë arsyeja që këtë vit ta nis komisionin me prezence fizike. Sic e patë vetë, u bëtë dëshmitarë të një përplasje. Me vjen keq sepse është një përplasje me kolegët tanë që duan të prishin seancat. Keqardhjen më të madhe e kam për aludimet.
Më vjen keq që për shkak të këtij konfuzioni ne kemi përkeqësuar klimën. Kjo formë e të bërit opozitë nuk na ka nxjerrë në dritë”, tha deputetja Açka.
