Policia e Tiranës pas një aksioni policor “Punisher 2” ka arrestuar ditën e sotme 5 persona që shpërndanin lëndë narkotike në kryeqytet, mes tyre edhe dy shtetas të Kosovës.
Besnik Mujeci, i identifikuar si Këshilltari komunal i Prishtinës nga radhët e Lëvizjes Vetëvendosje, është pjesë e grupit të të arrestuarve nga Policia e Shtetit në Tiranë në kuadër të operacionit antidrogë.
Mujeci së bashku me personat e tjerë të arrestuar janë lokalizuar në kryqëzimin e rrugëve “Myslym Shyri” dhe “Sami Frashëri” në Tiranë së bashku me dërgesën me lëndë të dyshuar narkotike, prej 11 300 tabletash ekstazi, me peshë 5.093 kg dhe vlerë tregu rreth 400 mijë euro.
Ndërkohë në pranga kanë rënë edhe Mithat Ramadani 30 vjeç, Kalem Picari, 24 vjeç, Ambra Myftari 28 vjeçe, Daniel Avdija 26 vjeç.
Drejtori i Policisë së Tiranës, Tonin Vocaj, bëri me dije se këta persona shfrytëzonin fluksin e sezonit turistik dhe e transportonin drogën sintetike nëpërmjet autobusëve të linjës Prishtinë–Tiranë.
Pasi dërgesat arrinin në Tiranë, transportoheshin me autovetura të marra me qira në Tiranë dhe në qytete të tjera, kryesisht bregdetare, dhe vendet e shkëmbimit caktoheshin në vende publike me shumë lëvizje dhe fluks njerëzish.
Për arritjen e marrëveshjeve me shpërndarësit e drogave sintetike në Shqipëri, trafikantët kërkonin pagesa paradhënie ose edhe lënien e automjeteve si garanci.
Tabletat e ekstazisë MDMA, së bashku me një sasi lënde narkotike kanabis, një automjet, si dhe 5 aparate celulare, u sekuestruan në cilësinë e provës materiale.
