Ish -drejtori i Agjencisë Kombëtare të Ujësjellës Kanalizimeve Tiranë nga radhët e LSI, Ardian Alushi ka reaguar pas kallëzimit që iu bë nga Ministria e Energjisë dhe Infrastrukturës nën akuzën për “Shpërdorim detyre”.
Sipas ministrisë, Alushi në bashkëpunim me persona të tjerë i kanë shkaktuar shtetit një dëm prej 21 milionë eurosh.
Në reagimin e tij, Alushi thotë se akuzat janë një stisje të motivuara politikisht dhe se ai ka zbatuar ligjin.
“Çdo akt apo veprim juridik apo financiar është miratuar nga Banka Japoneze për Bashkëpunim Ndërkombëtar(JICA), në përputhje me marrëveshjen e miratuar në parlament në vitin 2008. E cila ka monitoruar dhe certifikuar te gjithë ecurinë e projektit nga fillimi deri sot”,- shprehet Alushi.
Ai tregon se projekti për të cilin Gjiknuri pretendon se është abuzuar është audituar në detaje nga Kontrrolli i Lartë i Shtetit.
Sipas tij, me cilësinë e drejtuesit ka respektuar ligjin pikë për pikë, por këtë gjë nuk kanë dashur t’a shohin dhe evidentojnë audituesit politik të Ministrisë së Energjisë.
“Gjyqet politike të bekuara nga Edi Rama nuk tregojnë asgjë më shumë se mjerimi aktual i administratës që është tashmë prej gjuetisë së shtrigave në emër të drejtësisë”,- citohet nga reagimi i tij.
