Armando Prenga dorëzon mandatin e deputetit. Përmes një letre drejtuar kreut të Kuvendit, deputeti i PS për Kurbinin thotë se kërkon dorëheqjen. Ai thotë se kërkon qetësi familje dhe se akuzat ndaj tij janë të ulëta.
Vendimi vjen në një kohë kur po hetohet nga prokuroria, për shkak se nuk deklaroi dënimet në formularin e vetëdeklarimit. Javën e kaluar KQZ hezitoi ti hiqte mandatin Prengës.
Në letrën e tij Prenga thotë se ligji i dekriminalizimit nuk parashikon në asnjë rast ndërprerje të mandatit të të zgjedhurit, por dënim me gjobë, por ka zgjedhur të dorëzojë mandatin për qetësinë e familjes së tij.
“Por dëshiroj t’ju informoj, ju z. Kryetar dhe opinionin publik se ligji nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, në asnjë dispozitë të tij nuk parashikon ndërprerje të mandatit të të zgjedhurve, por një dënim me gjobë, siç është rasti im. Por, për qetësinë time dhe të familjes sime, deklaroj si më sipër, se heq dorë, sot dhe gjithmonë, nga mandati që zgjedhësit e mi dhe Kushtetuta më kanë ngarkuar”, shkruan Prenga në kërkesën e tij drejtuar Kuvendit.
