15 kosovarë, punonjës të komunës së Rahovecit që kishin ardhur për të kaluar fundjavën në bregdetin e Durrësit përfunduan në spital pasi u helmuan nga ushqimi. Ata mbahen prej të dielës në terapi. Duke folur për portalin Durrësilajm ata thonë se në restorantin ku drekuan mungonin kushtet higjieno-sanitare dhe ankohen për ushqimin.
Në depozitat e ujit dhe në kuzhinë mund të kishte minj, sipas fjalëve që ishin përhapur nga vetë stafi i shërbimit të hotelit. Në intervistat e dhëna, pushuesit thanë se ushqimi ishte servirur i ftohtë, ndërsa uji që kishin pirë mund të ketë qenë një prej shkaqeve kryesore të helmimit.
Ata thonë se edhe ëmbëlsira që kishin konsumuar nuk ishte e freskët, ndërsa të tjerë thonë se pijet ishin produkte të ambalazhuara në Shqipëri dhe mund të jenë shkak i helmimit të tyre masiv vetëm një orë pasi kishin konsumuar drekën.
AKU ka pezulluar aktivitetin e restorantit deri në përfundim të analizave të mostrave ushqimore dhe të inspektimit total të ambienteve të restorantit dhe të depozitave të ujit, ku dyshohet se mund të kenë rënë minj.
