Përforcohet edhe më tej pista se 39-vjeçari shqiptar Bledar Dedja u vra si pasojë e një krimi pasioni.
Mediat italiane kanë publikuar rezultatet e autopsisë, që vërtetojnë dyshimet se shqiptari humbi jetën si pasojë e një goditje të marrë në mushkëri, goditje që i erdhi nga pas.
Dedja u godit mbi 20 herë me thikë mbrëmjen e së shtunës në një pyll të Paderno del Grappa, në Asolo të Treviso-s.
Pjesa më e madhe e plagëve u shkaktuan gjatë tentativës së 39-vjeçarit për t’u vetëmbrojtur. Për hetuesit janë tregues se autor i krimit ka qenë një person i vetëm dhe shanset që të ketë qenë një person i dytë janë të pakta.
Ka disa indicie që i bëjnë hetuesit të besojnë se bëhet fjalë për një krim pasioni.
Dedja u gjet me pantallonat e ulura dhe vendi ku u gjet njihet si një zonë që frekuentohet nga çiftet.
Celulari i 39-vjeçarit po analizohet me vëmendje nga hetuesit, të cilët kërkojnë të dhëna për një lidhje të mundshme jashtëmartesore, që mund t’i ketë kushtuar jetën Dedjas.
Po sipas asaj që shkruajnë mediat fqinje, përgjatë këtyre ditëve janë marrë në pyetje disa persona. Në mesin e familjarëve dhe miqve të tij, rezulton se në pyetje është marrë edhe një grua. Kjo e fundit para hetuesve ka deklaruar se e kishte njohur Dedjan dy vjet më parë, nëpërmjet një aplikacioni takimesh.
Bledar Dedja ishte i martuar dhe baba i dy fëmijëve.
