Autoritetet gjermane gjetën tre ditë më parë një trup të pajetë të gjinisë mashkull. Ndërkaq, mediat e huaja shkruajnë se tashmë është identifikuar viktima. Bëhet fjalë për një 27-vjeçar shqiptar.
Trupi u gjet të shtunën mbrëma jo shumë larg banjave termale Holstentherme në Kaltenkirchen. Sipas policisë, viktima ka marrë një plagë me armë zjarri. Sipas informacioneve të deritanishme, shqiptari mësohet se nuk kishte vendbanim të përhershëm. Megjithatë, ai ishte i njohur për policinë.
Policia ka dhënë edhe detaje në lidhje me autorin e dyshuar. Thuhet se kanë nisur hetimet ndaj një 17-vjeçari, i cili ka mundësi të jetë shqiptar pasi flet shqip. I mituri aktualisht ndodhet në paraburgim.
Sipas mediave të huaja, të dielën, me kërkesë të prokurorit publik, gjykata lëshoi një urdhër-arresti ndaj 17-vjeçarit me dyshime të forta për vrasje.
Ndër të tjera, është e paqartë se ku është vrarë saktësisht 27-vjeçari dhe si ka mbërritur trupi në Kaltenkirchen.
