Në datë 4 Janar 2022, në zonën e Don Boskos në Tiranë ndodh një masakër me 1 të vrarë dhe 4 të plagosur. Por, mesa duket në këtë vrasje ishte ngatërruar objektivi. Kjo del nga dëshmia e Indrit Beqiraj, i cili është arrestuar së bashku me vëllain e tij Gentjanin, dhe ka rrëfyer disa krime të pazbardhura si dhe ka zbuluar një grup vrasësish me pagesë.
Sipas kësaj dëshmie, objektivat e atentatit ishin Geron Hasanbelliu dhe nipërit e tij. Porosia për vrasje ishte dhënë nga Kasandër Noga në Belgjikë, sipas dëshmisë së Indrit Beqiraj.
Kasandër Noga dhe Geron Hasanbelliu kanë histori të vjetër hakmarrje mes tyre.
Në dëshminë e tij për ngjarjen e 4 Janarit 2022 në Don Bosko që është publikuar nga emisioni Uniko nga Spartak Koka në Klan Plus, Indrit Beqiraj tregon se ai dhe vëllai i tij, së bashku me Kevin Zenelin (Suçi) kishin ndjekur Geron Hasanbelliun dhe nipat e tij. Ata kishin parë se Geron Hasanbelliu pinte shpesh kafe në të njëjtin lokal. Por dy vëllezërit Beqiraj, të pajtuar nga Kevin Zeneli me porosi të Kasandër Nogës për të vrarë Geron Hasanbelliun, nuk kishin mundur.
Deri sa, më 4 Janar, sipas Indrit Beqiraj, vetë Kevin Zeneli kishte shkuar me disa persona të tjerë dhe kishte hapur zjarr me breshëri kallashnikovi në këtë lokal.
Por objektivi ishte ngatërruar. Shënjestra nuk ndodhej aty. Për pasojë u vra në i pafajshëm dhe u plagosën 4 të tjerë, asnjëri prej të cilëve nuk kishte lidhje me ngjarjen.
Indrit Beqiraj u ka thënë hetuesve se këtë vrasje e bëri Kevin Zeneli me disa persona të tjerë, për të cilët nuk ka informacion se cilët janë.
DËSHMIA E INDRIT BEQIRAJ: Më datë 04.01.2022, ka ndodhur një ngjarje në Don Bosko tek lokal Fokus, ku është qëlluar me armë dhe janë vrarë persona, kam parë në lajme ngjarjen ku ndër të tjera, pashë nga kamerat edhe makinën Benz që më kishin sjellë mua më parë për të vrarë Manecin dhe që ma mori Kevin pa lajmëruar.
E kam telefonuar Kevin direkt por nuk ma ka hapur telefonin. Nga data 06.01.2022 më telefonon Kevin dhe më kërkon një test Covidi për të kaluar kufirin, ia bëj në Durrës tek një laborator i Ergys Hoxhës me emrin “Kasa” që ndodhet në Kënetë në Rrugën Vllazërimi.
Ia kam bërë dhe ka ardhur për ta marrë vetë dhe ka paguar lekët për testin dhe më la dhe mua 50 Euro. Kevinin e nxorra direkt tek Ura e Dajlanit në këmbë dhe gjatë kësaj kohe e pyeta për punën e Don Boskos dhe thashë që ç’a bëtë pse u gabua objektivi se është gjynah se u vra tjetër për tjetër.
Më tha u gabua informata. Kur e pyeta se me kë kishte qenë ai nuk më tregoi emër a person por më tha që i kishte dhënë njërit një shumë prej 50.000 Euro dhe Kevinin e mori nga Ura e Dajlanit një makinë tip Porsche Cayene tip i fundit se topat mbrapa i kishte me viza.
Objektiv i atentatit në atë ngjarje ka qenë Geron Hasanbelliu. Kevin është larguar drejt Kroacisë pastaj Gjermanisë dhe në dijeninë time është takuar dhe me Kasandrin i cili i ka kërkuar llogari për ngjarjen tek Don Bosko. Ka komunikuar me mua dhe më ka thënë që të vrisja nipat e Geronit pasi kishin dalë në Astir./Tvklan.al
