Gjykata e Posaçme i ka komunikuar masën e sigurisë “arrest në burg”, ish-kreut të bandës së Durrësit Lulzim Berisha.
Lulzim Berisha u ekstradua nga Spanja pak ditë më parë.
“Dua të sqaroj se i ashtëquajturi Luftar Reçi, bën kërkesa dhe krijon artifica duke mashtruar institucionet shtetërore. I bëj thirrje prokurorëve që përdorimi i bashkëpunëtorë të drejtësisë për interesa të caktuara, cënon rëndë sigurinë e jetës, kombëtare dhe sigurinë e pronës. Prokurori duhet t’i nënshtrohet pavarësisë së ushtrimit të detyrës”, deklaroi avokati i Lulzim Berishës.
Ish-kreu i bandës së Durrësit u arrestua në Dhjetorin e 2024-ës në Spanjë pas shkëmbimit të informacioneve me autoritetet e drejtësisë shqiptare.
52-vjeçari u shpall në kërkim në Janar të vitit 2022 për vrasjen Klodian Saliut, krim i ndodhur në 2005.
Në vitin 2016 ai arriti të dilte nga burgu pa e mbyllur dënimin prej 25 vitesh, duke u liruar me kusht nga Gjykata e Shkallës së Parë në Durrës me pretendimet e shkaqeve shëndetësore. Por Gjykata e Lartë rrëzoi vendimin e lirimit të tij me kusht.
