Qytetari Enter Bushi, i cili kishte të shtruar nënën në Spitalin Rajonal Fier, tregon se atje kishte njohur një 78-vjeçar nga Patosi, i cili ishte djegur dhe ishte i vetmuar.
Sipas Enterit, i moshuari ishte i varfër dhe i pastrehë, ndaj ai mendoi se nga emisioni “Stop”, do të gjendej një zgjidhje.
“Ju kam sjellë për një apel për ndihmë për një qytetar të moshës 70-vjeçare. E kam njohur në Spitalin Rajonal të Fierit aty ku kam edhe mamanë time të shtruar. Është i djegur dhe është i shtruar, e kam ndihmuar me ato mundësi që kam. Më ka thënë që jeton në një barake, por nuk më tregon më shumë hollësi sepse qan sapo unë shkoj e pyes. Kërkoj që ta ndihmoni qoftë nga ana shëndetësore, qoftë nga ana e strehimit”, tha qytetari Enter Bushi.
“Stop” shkoi vetë në spitalin e Fierit, ku i moshuari Sulo Yzeiri tregon se është djegur me bombol gazi, duke u përpjekur të bënte një kafe. Ai merr vetëm 70 mijë lekë pension pleqërie dhe për këtë arsye, kërkon ndihmë ekonomike dhe strehim pasi aktualisht banon në një barakë.
“Unë u ngrita në mëngjes, i vetëm jam, u ngrita për të bërë kafen, që mos e pishfa atë kafe. Shkova të ndizja bombolën e gazit, ajo kishte lëvizur sa shkoj unë që ta ndez morën direkt rrobat flakë, pashë veten time që po digjesha. Kisha një bidon me ujë atje, u mundova që të fikja rrobat, kërkova ndihmë, por asnjëri nuk më ndihmoi. Shkova avash-avash tek furgoni i bashkisë më morën dhe më sollën tek spitali këtu. Ajo doktoresha në Patos nuk erdhi fare që të më shikonte mua. Lajmëruan një djalë dhe erdhën më sollën këtu. Lëkura u zhvesh dhe lëkura doli sheshit. Jam i vetëm, gruaja më ka vdekur 25 vite më parë, edhe motrat e vëllezërit më kanë vdekur. Vetëm 70 mijë lekë të vjetra pension marr, ashtu rroj herë me bukë e herë pa bukë. Kam kërkuar ndihmë më parë tek bashkia, por nuk e aprovoi Këshilli Bashkiak. Kërkova një strehë që të jetoj si gjithë të tjerët, jetoj në një barake, çfarë bie jashtë futet brenda”, tregoi i përlotur 78-vjeçari Sulo Yzeiri.
Gazetarja e “Stop” çon në spital Shërbimin Social dhe Ndihmën ekonomike të Bashkisë Patos dhe kryebashkiaku Fation Duro premton ta sistemojnë të moshuarin në një banesë sociale.
“Zotëria është sistemuar në një banesë sociale dhe ka ikur pas një jave. Do sistemojmë përsëri nuk ka asnjë lloj problemi. Do të sistemohet përsëri tek një nga banesat sociale që ka Bashkia Patos”, tha kryebashkiaku Fation Duro.
Nëse Sulo Yzeiri nuk do të ndjehet mirë, bashkia mund ta çojë në çdo kohë në Shtëpinë e të Moshuarve Fier./tvklan.al
