Një ngjarje e rëndë ka ndodhur mbrëmjen e së premtes në Tiranë. Një vajzë është hedhur nga kati i dytë një banese pasi është dhunuar nga bashkëjetuesi i saj.
Pas ngjarjes, policia ka vënë në pranga 24-vjeçarin për veprën penale “Dhuna në familje” dhe “Shkaktimi i vetëvrasjes” mbetur në tentativë.
Vajza e cila u hodh nga kati i dytë i banesës, aktualisht ndodhet në kujdesin e mjekëve, jashtë rrezikut për jetën.
“Ushtroi dhunë ndaj bashkëjetueses së tij, e cila si pasojë e dhunës tentoi të vetëvritej duke u hedhur nga kati i dytë i banesës, arrestohet 24-vjeçari. Specialistët për Hetimin e Krimeve të Komisariatit të Policisë Nr. 4, pas marrjes së njoftimit se mbrëmjen e djeshme rreth orës 23:30, një shtetase ishte vetëhedhur nga kati i dytë i banesës, menjëherë kanë organizuar punën për sqarimin e rrethanave të ngjarjes dhe dokumentimin e plotë ligjor të saj. Në vijim të veprimeve hetimore të kryera, specialistët për Hetimin e Krimeve në Komisariatin e Policisë Nr. 4 arrestuan shtetasin E. H., 24 vjeç, banues në Tiranë, për veprat penale “Dhuna në familje” dhe “Shkaktimi i vetëvrasjes” mbetur në tentativë, parashikuar nga nenet 130/a dhe 99 e 22 të Kodit Penal. 24-vjeçari dyshohet se mbrëmjen e djeshme, rreth orës 23:30 ka ushtruar dhunë ndaj bashkëjetueses së tij, e cila si pasojë e dhunës është vetëhedhur nga kati i dytë i banesës. Aktualisht ndodhet në kujdesin e mjekëve, jashtë rrezikut për jetën”, thotë Policia.
